تعرّف على دراسة الهندسة المعمارية في فرنسا

إعداد وكتابة رامان اسماعيل

انت لاجئ وحابب تدرس عمارة بفرنسا؟ هالمقالة خص نص لحضرتك
لدراسة العمارة بفرنسا، لازم تدخل حصراً لاحدى المدارس الوطنية العليا للعمارة بفرنسا (ENSA: école nationale supérieure d’architecture ) و هنن ٢٢ مدرسة موزعين بكافة الاقاليم الفرنسية.
دراسة العمارة عبارة عن ٥ سنين، ٣ سنين ليسانس و سنتين ماستر.

شو هي الخطوات اللازم اتباعها لتقدر تفوت على مدرسة هندسة العمارة؟

فيك تقدم على احدى المدارس العليا ابتداءً من السنة الاولى بشهادة بكلوريا عامة او مهنية، بشهادة معهد مستوى BTS بفرنسا،  او حتى تعدل او تكمل دراستك يلي بلشت فيها ببلدك.

طبعا طريقة التسجيل و تعبئة الملف بتختلف نوعاً ما من مدرسة للتانية و حسب مستواك الدراسي، و لنكون واضحين اكتر، رح اشرحلكون كل خطوة و شو الفرق بين الملف و التاني؛

ماتنسوا انو قبل كان في امتحان للدخول للمدرسة، من السنة الماضية تم إلغاء الامتحان وفينا نقول انو كل مدرسة عندها طريقتها بالقبول.

• اخدت بكلوريتك بفرنسا:

الطريقة الوحيدة هي انك تتبع ال ParcourSUP حنكتب مقالة قريباً عن هل الشي.

• انت لاجئ و اخدت البكلوريا ببلدك، او معك شهادة معهد او عامل من قبل كم سنة عمارة ببلدك؟
  الملف هون بيختلف حسب كل مدرسة و في خيارين:
• الملف الاصفر le dossier jaune : ملف بسجل عن طريقه اغلب الطلاب الاجانب بفرنسا (طلاب المغرب العربي مثلا) هون فيك تنزل الملف الأصفر هون.
• الـ VAE : وهي “Validation des Acquis de l’expérience professionnelle”  لتفاصيل أكتر راجع مقالتنا هون.

مشان ما تتلبك و تضيع، لا توجع راسك باسم الملف، لانو صراحة الملفين متشابهين، بنسبة ٨٥٪ بكون عبارة عن تعبئة معلومات شخصية مثل الاسم و الكنية و العنوان إلخ…
الاختلاف هو بموعد التسجيل وبالأوراق الاضافية يلي رح يطلبوها منك، طبعا شي بديهي انه اذا انت دارس عمارة من قبل او شي معهد، رح يطلبوا منك اوراق و اثباتات اكتر.

لكن اهم ورقة رح يطلبوها منك و يدرسوها، هي الرسالة التحفيزية، لذلك لازم تحط جهدك على هالورقة يلي لازم تشرح فيها حياتك و مسارك الدراسي، و الحوافز و الدوافع يلي عم تشجعك لتسجل عمارة بفرنسا و بالمدرسة يلي اخترتها.

 

انتبه :

لتعرف موعد التسجيل والملف يلي لازم تعبيه، لازم حصرا تشوف على موقع المدرسة او تتواصل معهون، لانو الشي المختلف بين الجامعات والمدارس العليا بفرنسا هو انه كل مدرسة عليا إلها إجراءاتها الخاصة ومواعيدها الخاصة بالتسجيل و ممكن هالشي يختلف من مدرسة لاخرى.
لهيك بنصحكون انكون تتواصلوا مع المدرسة اعتباراً من بداية  شهر تشرين الثاني (نوڤمبر).

 

شو يصير بعد ما بعتت الملف واجيتك رسالة من المدرسة؟

تقدم ملفك، في لجنة رح تدرسها، وممكن يا يقبلوك مباشرة، او يدعوك لمقابلة شفهية يلي لازم تشرح فيها الحوافز يلي عم تدفعك لتدرس عمارة، السبب والاشياء يلي ممكن تلهمك او توحيك بهالمهنة.

لازم تعرفوا انو في كتير طلب على مدارس الوطنية للهندسة المعمارية كل سنة كل مدرسة بتجيها بين ال ٢٥٠٠ وال٣٠٠٠ طلب.
اللجنة بتدرس الملفات اول مرة و بتختار حوالي ال٧٠٠ طالب لتدعيهون للمقابلة الشفهية.
بعد نهاية كافة المقابلات، المدرسة بتختار بين ال٩٥ و ال١٢٠ طالب (حسب سعة المدرسة) ليدخلوا للعام الدراسي الجديد.

بهالرابطين رح تشوف اسماء و عناوين المدارس و توزيعهون على خريطة فرنسا:
اسماء و عناوين المدارس العليا هون
التوزيع الجغرافي للمدارس العليا بفرنسا هون

نسينا شي او عندك ايا استفسار؟ اتركلنا تعليق عالعام و رح نجاوبك باقصى وقت ممكن.